تجربة اجتياز امتحان B2 جوته
هذه التجربة مهداة للدكتور Mohamed Nasser لأنه من الناس فعلاً اللي بتساعد بقلبها وانا أحبه في الله
الحمد دخلت الامتحان في 6 فبراير و الجميع كان مستغرب جداً أنا ليه بجازف ودخلت بدري لأني انهيت امتحان الـ B1 في 7 ديسمبر يعني تقريباً شهرين وفي رأي ناس كتير إني استعجلت ولسه بدري
الخلاصة ، حدد هدفك ومتخليش حد يقلك مستحيل وخليك دايماً تجربة استثنائية وطالما حد قبلك قدر يبقا إنت كمان هتقدر إن شاء الله
بدأت دراسة فعلية لمستوى الـ B2 ذاتياً يوم 10 ديسمبر من كتاب Aspekte Neu B2 وبصراحة الكورس ده ممتاز جداً وبنصح بيه وموجود في البوست المثبت
ليه بنصح بكتاب اسبكته ؟ أولاً الكتاب طبعة حديثة والتمارين اللي فيه بالظبط نفس طريقة اسئلة امتحان Goethe و Telc
ثانياً الكتاب فيه كمية كلمات كتيرة هتفيدك جداً + نصوص قراءة فوق الممتازة ، والأجمل أنه بيساعدك في جزء الكتابة جداً + والميزة الأكبر في وجهة نظري إنه عامل تجميعات لأغلب قواعد اللغة في جداول بسيطة و تجميعات لل Ausdrücke وتجميعات لل Nomen und Verben Verbindungen وتجميعات لحروف الجر كلها واللي هيدخل امتحان الـ B2 هيعرف ان التجميعات دي أهم من الكورس نفسه لانها بتلخص وبتركز جداً ..
عيبه من رأيي فقط في السماعي مش قوي أوي ومش شرط يكون رأيي صح وهذكر السبب بعدين .
الكورس كله عبارة عن 10 وحدات كل وحدة مقسمة ل 33 دروس كل درس يتم التركيز فيه على شئ معين وبينقلك تدريجياً من مستوى B1 لـ مستوى B2
أنا شخصياً كنت بتستمتع بنصوص القراءة و خلصت أول 3 وحدات من الـ 100 وبعدين نزل مواعيد الامتحان وقررت ادخل في امتحان فبراير ، وكان أصعب قرار خدته لأني كنت محتاج الشهرين دول بس علشان أخلص الكورس ده ومحتاج شهرين كمان زيهم تحضير للامتحان ! فقررت إني اذاكر الكورس وأحضر للامتحان بالتوازي
الموضوع كان صعب إني أنجزه لوحدي طبعاً فاخدت كورس تحضير للامتحان عند مدرس وأذاكر من الكورس لوحدي في البيت ، كنت مقسم الأسبوع 5 أيام كورس و يومين تحضير للإمتحان .. بصراحة في نص الكورس حسيت بإن مستوايا اتحسن ومحتاج أركز اكتر في طريقة التحضير ، علشان كده مقدرتش احكم على السماعي بتاع الكورس ده قوي ولا لاء لاني مخلصتوش للآخر
دي الماتريالز اللي حضرت منها للامتحان وموجودة في البوست المثبت
Station B2
Cornelsen Prüfung B2 training
Fit für Zertifikat B2
Mit Erfolg B2
Aspekte ,EM B2 Modelltest
Goethe Institute Modelltest B2 *
Spass
أهم وأقوى كتاب طبعاً شتاتسيون فيه اسئلة جرامر و كلمات كتيرة جداً ، كورنسلن مستواه متوسط و fit مستواه قوي
و mit erfolg مستواه ضعيف مش مستوى B22 ممكن تبتدي بيه لو عندك وقت طويل لبقية الكتب و بالنسبة لامتحانات
معهد جوته نفسها تقريباً نفس مستوى الامتحان يعني خليه قبل الامتحان بكام يوم علشان تقدر تقيم نفسك صح
هقـول نصائح بالنسبة لتحضير الإمتحان و طريقة التحضير لكل جزء في الامتحان
* نصائح عامة
1 - تحضير الامتحان أهم من الكورس نفسه .. حتى لو خلصت كورس C11 ممكن تدخل متنجحش في امتحان B2 بدون تحضير فحاول بقدر الإمكان تدي فرصة كبيرة للتحضير
2 - الفترة اللي حضرت فيها كانت قليلة بس كثفت عدد الساعات وصلت ل 100 ساعات قبل الامتحان باسبوعين وكنت بحس بصداع شديد لمدة اسابيع فحاولوا تخففوا عن نفسكم قبلها بوقت كافي بحيث لا يتعدى عدد الساعات 6 يومياً
3 - التجميعات والتلخيصات ، هي مفتاح النجاح بالنسبة لي / خلي دايماً عندك كشكول اول ماتبدأ تحضر من كتب الامتحانات وجمع فيها كل كلمة جديدة او اتكررت كتير واحفظهم كويس / وأي Ausdrück وأي ملاحظة تخصص الجرامر اللي في الامتحان سجلها عندك هتنفعك في الآخر
أغلب كتب B2 بيعملوا تجميعات كويسة جداً في آخر الكتاب انصح بتجميعات Aspekte في الAusdruck و nomen und verben والجرامر او كتاب EM بردو تجميعاته كويسة جداً في حروف الجر والجرامر
4 - دايماً حط نفسك في مود الامتحان وحل بالوقت لا اكتر ولا اقل ومتستخدمش قواميس اثناء الحل يعني متغشش نفسك بعد ماتخلص الحل ممكن تشوف الاجابات وتشوف الكلمات الصعبة
بالنسبة لأجزاء الامتحان
1 - الليزن
- للأسف امتحان B2 و C1 دايما معروفين بصعوبة الجزء ده عكس المستويات اللي قبلها بيكون مستوى الهورين هو اللي أصعب
الجزء ده مقسم لأربع أجزاء
- إعلانات ( خمس أشخاص بيدوروا على حاجة معينة وسط 8 إعلانات)
فيه دايماً Bispiell وده بياخد اعلان منهم وغير مسموح بانه يتكرر تاني ودايما وسط الخمس اشخاص فيه شخص Negativ
الجزء ده الجزء المخصص ليه 255 دقيقة المفروض توصل في آخر التحضير إنه بأسوء الظروف مياخدش أكتر من 20 دقيقة ، والوقت مهم جداً جداً في امتحان الـ B2 لو ضاع منك الوقت ضاع منك الامتحان للأسف
صعوبة الجزء ده تكمن إن بيلف ويدور كتير ويديك إتنين نفس المعنى تقريباً ونفس الكلمات ولكن شئ واحد مختلف وهو المطلوب في السؤال او ممكن استنتاجه بديهياً
يعني في امتحاني كان بيقول فيه شخص محتار مابين الـ Ausbildung والـ Studiumm وفي الاجابات فيه اتنين ينفعوا اجابة بتقول شركة بتعرض اوسبيلدونج و شهادة دراسية في نفس الوقت وإجابة تاني بتقول إحنا بنعرض عليكم إننا نوصلكم للقرار الصحيح الخاص بمستقبلكم التعليمي
الراجل في السؤال مقالش إنه عايز يتعلم ويعمل اوسبلدونج في نفس الوقت ! هو قال محتار فمحتاج ياخد قرار!
وهكذا دواليك يعني لازم تركز جداً وتسأل نفسك السؤال وتسيب عقلك يجاوب عليه ! لأن 999% هو بيتعمد يغلطك للأسف
استراتيجية حل السؤال ده إنك تطلع كلمات مفتاحية من كل سؤال وتدور بيها على الاجابة تقرأ اول الاجابة واخرها بسرعة لو لقيت الكلمات المفتاحية موجودة اقرأ الاجابة ببطئ تاني و احتمال كبير تكون هي والاجابة بتكون في آخر سطرين بنسبة كبيرة تكاد تكون 90 %
- قطعة قراءة و عليها 5 أسئلة
الجزء المخصص 25 دقيقة - لازم يتحل في 20 دقيقة
نفس فكرة B11 تقراً الاسئلة بالترتيب وتطلع الاجابة وانت بتقرأ وكل سؤال في الغالب بيكون في Abshnitt مختلف وممكن يجي سؤالين من نفس الابشنت ، السؤال ده محتاج حصيلة لغوية عالية لا أكثر ولا أقل ومش ملزم تفهم كل كلمة في القطعة يكفي إنك تفهم السؤال وتقدر تطلع الإجابة بدون فهم كامل للقطعة
- قطعة قراءة فيها رأي كاتب في موضوع معين
الجزء المخصص 25 دقيقة - لازم يتحل في 20 دقيقة
السؤال ده هيتحل رقم 4 مش رقم 3 يعني هنسبيه للأخر خالص لأنه أسهل سؤال
بيطلب منك تشوف رأي الكاتب ايجابي أو سلبي في خمس نقاط معينة
الرأي الإيجابي دائماً بتلاقي ليه كلمات معينة والسلبي ليها كلمات سلبية دايماً بالنفي أو الاشمئزاز
يعني بدون عناء ومن غير ماتفهم القطعة تقدر من الجملة تفهم هي سلبية ولا ايجابية لكن الأهم في هذا السؤال انك تفهم النقاط اللي يقصدها لانه بيلغبطك بردو للأسف
يعني مثال موضوع الهجرة إلى ألمانيا الكاتب عرض نقطة الاضطهاد من الحكومة ضد المهاجرين وإنه لازم الحكومه تهتم بيهم أكتر ويوفر لهم عمل يكسبوا منه و في السؤال قألك رأي الكاتب في دور الحكومة ممكن تفتكر إنه ايجابي لكن هو سلبي لأن الحكومة لسه ماقامت بدورها الواجب
وهكذا
- قطعة قراءة فيها 10 كلمات ناقصة والمفروض تكملهم من عندك
مدة الجزء ده 15 دقيقة و وهتستغل 10 دقائق عليهم كمان من الاسئلة السابقة وهيتحل رقم 3
الجزء ده بيعتمد على حاجتين وأنا للأسف كنت ضعيف جداً فيهم لضيق الوقت علشان كده درجتي في الليزن سيئة بسبب الجزء ده
- أولاً الجرامر ، لازم تكون عندك خلفية كاملة بكل قواعد الألمانية وحروف الجر والـ Artikelss و الافعال المرتبطة بحروف جر معينة و ... الخ
- حصيلة لغوية عالية جداً لانه احيانا بيطلب منك فعل معين او اسم معين وإنت عارف المعنى بالعربي لكن مش عارف تجيب الكلمة بالألماني
الجميل في هذه الجزء إنه ممكن يديلك 3 - 4 نقط هدية ! يعني يديك الإجابة من جمل سابقة نفس الكلمة تقريباً
يطلب منك Artikel لكلمة سهلة ومعروفة يطلب منك Modalverb
الأصعب إنه يطلب منك كلمة يكمل معنى الجملة أو يجيب لك فعل بياخد اكتر من حرف جر ومطلوب تعرف انسب حرف جر
نصيحتي في الجزء ده إنك كل ما تحل امتحان تدون ملاحظات الجزء ده في كشكول لوحده يعني فعل معاه حرف تسجله لانه ممكن يعدي عليك تاني او تركيبه معينة معروفة زي in kauf nehmen أو كلمات بتيجي دايما مع روابط معينة زي nicht nur ,,, als auch وصدقني الدرجة الواحدة بتفرق وممكن تعديك من الامتحان كله
ويستحسن التجميعات دي تعملها بنفسك أفضل عشان تحفظها
-----------------------------------------------------------------
2 - الهورين
ده سهل جداً لو عملت بالنصائح دي وحضرت له كويس
11 - اسمع كل يوم ما لايقل عن ساعة أو ساعة ونصف ألماني ( صوتيات فيديوهات / نشرة أخبار/ أفلام ...الخ) في البيت في المواصلات في الشغل في المطعم ... أي مكان عيش جو ألماني
دي أكتر حاجات كنت بسمعها وحسنت معايا السماعي كويس جداً
DW Top thema
Easy german Videos
Detusch Radio ده ابلكيشن على App store فيه كل قنوات الراديو الألماني
طبعاً إنت لو خارج من b1 مظبط الهورين وسامع كتير هترتاح في الـ B2
واسمع الصوتيات بتاع كتب الامتحانات اللي حلتها قبل كده وخاصة شتاتسيون لان مستواها قوي نفس مستوى الامتحان تقريباً كأنها اغاني وبتسمعها كذا مرة هتحسن عندك السمع حتى لو مش فاهم كل كلمة
استراتيجية حل السؤال *
هو جزءين هورين قصير وهورين طويل
- الهورين القصير .. بيجيب لك مكالمة تليفون وفيه جدول فيه خمس نقاط
المكالمة عبارة عن شخص بيتكلم وبيصلح أخطاء او بيضيف كلمة أو يصحح ميعاد أو يوم في جدول معين
بيكون جدول مواعيد كورسات او رحلات او ... الخ و مثلا يقول هنغير يوم الخميس ونخليه يوم الأربع او الساعة دي غلط هتبقا كذا و ممكن يقول انه نسي مثل يذكر اسم الشارع او المدينة ويقول اسم المدينة
المفروض انك في كل نقطة بتكتب التصحيح او الاضافة بتاعته زي ماقالها بالظبط ولا حرف ولا كلمة ناقصة او زيادة
الجزء ده سهل بس مشكلته إنه بيتقال مرة واحدة يعني لو مسمعتش الكلمة انسى خلاص انك تحلها او تجيبها صح
فالمطلوب التركيز لان النقطة الواحدة بدرجتين .. ودايما فيه كلمة بيقولها بتكون بعدها الأجابة على طول sondern
- لو وقعت منك تقطة في السؤال ده سيبها واوعى تقعد تفكر فيه لانه ممكن يخطف النقطة التانية في ثانية بعدها وتبقا خسرت اربع درجات مش درجتين بس
اكتب الاجابة بسرعة اول مايقولها على ورقة الاسئلة حتى لو هتكتبها بالعربي او الفرانكو عشان متنسهاش
- الهورين الطويل .. عبارة عن لقاء في تلفزيون او راديو مذيع بيسأل اسئلة للضيف وهو بيرد عليها
في رأيي ده سهل جداً لانه بيتسمع مرتين ومقسمة في المرة التانية بتسهل عليك اكتر
الاول بيطلب منك تقرأ الاسئلة وعددهم 10 وعليهم اجابات a b c اختياري وبعدين تسمع المحادثة وبعدين تسمع المحادثة تانية مقسمة بمعنى إنه يشغلك الجزء اللي فيه اسئلة من 1 - 3 ويقولك اقرا الاسئلة والاجابة ويشغل الجزء وبعدين يديلك مهلة دقيقة تختار الاجابة وبعدين يتنقل على الجزء التالي
- أهم حاجة في الجزء ده هو توظيف الوقت لقراءة الأسئلة والاجابة اكتر من مرة ، لو عملت كده اضمن انك هتحل السؤال ده كويس ان شاء الله وهتجيب درجة تفرحك زي مادرجتي فرحتني فيه الحمد لله
ازاي توظف الوقت ؟
أولا من بداية مايبدأ امتحان الهورين وانت هتبدأ توظف الوقت .. من اول ما الممتحن بيشغل السي دي بيقول تعليمات لطريقة الاسئلة مدتها حوالي دقيقة استغل الدقيقة في انك تقرأ رأس الاسئلة في الجزء ده بالذات
بعدين يدخل على تعليمات الجزء الأول في الهورين اقرأ باقي رأس اسئلة الجزء الثاني ولو خلصتها وفيه وقت اقرأ اجابات الاسئلة
بعدين هيعمل صفارة ويقلك هنبتدي الجزء الأول ساعتها تبدأ تقرأ النقاط المطلوبة في الجزء الأول
بعد مايخلص هيديك حوالي دقيقتين تكتب فيهم الاجابات استغل الوقت ده بردو في انك تقرأ الاجابات بتاع الجزء التاني
بعدين هيدخل على تعليمات ومقدمة ومثال في الجزء الثاني اقرأ الاسئلة والاجابات مره تالتة
بعدين هيبدأ في السؤال والمحادثة هتكون عندك معرفة سابقة بكل كلمة هتتقال في كل سؤال وعارف هو عايز ايه وممكن تحل الامتحان كله من اول مرة يتكلم فيها لكن بلاش تتغر واسمع في تاني مرة كويس
--------------
الشرايبين
هو هدية الامتحان بالنسبة لي !
هو أهم وأسهل جزء في الامتحان كله ليه ؟ لأن قانون امتحان ال B2 بيطلب منك تجيب 600 % مجمعين للتلات اجزاء ليزن وهورين وشرايبين بواقع 45 درجة من 75 يعني ممكن تجيب 24 درجة مثلاً في الشرايبين لوحده و 10 درجات من 25 في الليزن و 11 في الهورين وتنجح ! لأن الشرايبين بدرجاته العالية عوض نقص درجات الهورين والليزن الكبيرة والنقطة دي في صالحك جداً استغلها وقوى عندك جزء الشرايبين واوعا تنقص اكثر من 5 درجات في الجزء ده لان الليزن والهورين مش مضمونين وممكن تقع فيهم بسهولة واسألوا مجربين كتير !
أزاي احصل على اعلى درجة في الشرايبين ؟ خلينا نشرح اجزاء الشرايبين بوضوح
- الشرايبين جزءين جزء كتابة وجزء تصحيح خطاً
11 - هنبتدي بالجزء الثاني ! وبأكد عليكم مرة تانية ابتدوا بتصحيح الخطأ ارجوكم ارجوكم ! لأنك ممكن تسرح بخيالك في الموضوع اللي بتكتبه وتنسى الجزء الثاني وتتفاجئ ان الممتحن بيلم منك الورقة وساعتها اخرج من الامتحان واحجز ميعاد الـ B2 القادم ودي حصلت مع صديق لي والله وزعلت جداً لاني كنت محذره قبلها وقلت له الاستراتيجية دي
تصحيح الخطأ أسهل مايكون ومع تحضير كويس ممكن تجيب 9 / 10 في الجزء ده والله ، هو بيكون عبارة عن خطاب وفيه اخطاء لغوية او جرامتيك ، في كل سطر غلطة واحدة ومطلوب منك تصحيح للخطأ
الاخطاء بتكون عبارة عن 5 او 66 حاجات ودور على الخطأ ده بالترتيب عشان متسرحش وتفكر في حاجات صح انها غلط
1 - حروف كل كلمة فيه حرف ناقص او زيادة ( دايما بيغلط في الكلمة اللي فيه حرفين متشابهين ورا بعض او ie يكتبها ei ...
22 - ترتيب الجملة خطأ وخاصة في الروابط لو رابط بيجيب الفعل في اخر الجملة يحطه هو رقم اتنين وهكذا
3 - تصريف فعل خطأ و ده سهل جدا لأنه لازم ولابد يكون صيغة الخطاب بصيغة الاحترام Sie فممكن يصرف الفعل مع du او يكتب sie بحرف Klein فدي اخطاء بسيطة جداً .. وممكن يصرف الفعل مع ich غلط
4 - غلطة في حرف جر . احفظ الافعال اللي بتيجي مع حروف جر معينة
5 - غلطة في المعنى . وده أصعب شئ يعني مثل الفعل المذكور مينفعش يجي بالمعنى المطلوب
الجزء الثاني
وده بجيب لك موضوعين تختار منهم موضوع وبعد ماتختار بيجيب لك ورقة فيها قطعة و عليها اربع محاور تتكلم عنهم ولا يجوز ابداً انك تنسى محور منهم ممكن تضيف محور خامس من عندك لكن لازم تتكلم عن الاربعة دول بشكل أساسي
استراتيجية حل السؤال ده خدتها من تجربة دكتور فراس الصفدي وهو ليه الفضل بعد الله إني اجيب درجة كويسة في الجزء ده لاني لو مامشيت بالاستراتيجية دي ماكان زماني بكتب التجربة دي !
الاستراتيجية
11 - بيدوك ورقة فاضية غير ورقة الاجابة تكتب فيها افكارك وكل حاجة قبل ماتكتب في ورقة الاجابة
اوعى تكتب موضوع كامل في الورقة دي ! لان مفيش وقت بل هتعمل كالآتي اعمل هامش على اليمين
واكتب 3 عنواين رئيسية Vokabeln - Ausdruck - - روابط
تحت الكلمات تكتب اي كلمة تيجي في بالك ليها علاقة بالموضوع او مرادف كلمة جات في المحاور علشان تعيد استخدام الجملة كلها بس بتغير بالمرادفات -
تحت الاوسدروك تكتب التعبيرات اللي انت مجمعها وحافظها علشان توظفها
الروابط اكتب اكتر الروابط اللي بتحبها وبتوظفها كويس وحاول تستخدم ما لايقل عن 100 جمل فيهم روابط ويكون ليهم معنى ليس تحصيل حاصل وخلاص
وابتدي اكتب اربع النقاط اللي هتتكلم عنهم يعني مجرد افكار وليس جمل
كمثال جالي موضوع عن الدراسة في الخارج .. المحاور كانت الصعوبات والمميزات ودور الحكومة والوضع في بلدك و رأيك في الموضوع فكنت بجمع افكار الاول في الورقة الفاضية وبعدين بسرعة ابتديت اكتب في الموضوع
اهم شئ تختار جمل بسيطة بلاش تعقد نفسك ! كل ما كان المعنى سهل ووصل بسهولة كل مادرجتك هتعلى بمعنى إن الموضوع بيتصحح بآلية معينة وهي عدد الكلمات والمحتوى والمعنى والتعبيرات الشائعة والروابط وصحة الجرامتيك
فلازم تلتزم بكل آلية علشان تضمن الدرجة حتى لو كاتب 5000 كلمة ممكن تاخد اقل من ربع الدرجة وممكن تكون كاتب 180 كلمة بالظبط بس منظم وسهل والمعنى مفهوم والمحاور كلها اتكلمت عنها هتاخد درجة تفرحك أوي !
- فيه مواضيع كتيرة جاهزة ممكن تقراها وتستفيد بطريقة الكتابة ، بس بلاش تحفظها لانك مهما حفظت مش هتفتكر 60 موضوع مثلاَ ! ولو افتكرتهم ممكن يطلب منك محاور غير المحاور اللي انت حافظها فالافضل انك تحفظ جمل وتعبيرات تفيدك وأضمن درجة حلوة ان شاء الله !
-------------------------------------------------
الموندليش
- ودي تاني أكبر هدية بعد الشرايبين
أولاً انا دخلت امتحان B1 ودخلت امتحان B2
هأكد على معلومة صحيحة 100 % ... ده أسهل جزء في أي امتحان والتجربة خير دليل
أنا متكلمتش طول فترة تعلمي الألماني كام جملة يذكروا لكن فعلاً سهولة الامتحان ده تكمن في ان الممتحننين ألمان واللي اتعامل مع الألمان هيعرف انهم اشخاص طيبين لأبعد حد وعايزين ينجحوك حتى لو مستواك ضعيف أهم حاجة الثقة بالنفس قدامهم !
هقول ملاحظات عامة
1 - حاول تروح اليوم ده بدري منك تتكلم مع الناس اللي هتمتحن وتدرب معاهم ومنك هتعرف المواضيع اللي جات للي قبلك يمكن حظك يجي في موضوع منهم ! وتكون انت عارف حاجة عنه
22 - حاول تختار شخص بترتاح له وتسجلوا ورا بعض وتدخلوا مع بعض وتكونوا متفقين مع بعض على النقاش اللي هيدور بينكم علشان محدش فيكم يتفاجئ ويتلغبط او يكون مستواه عالي فيعلي مستواه عليك ومتقدرش ترد عليه ويكون فعلة ضربة قوية ليك !
33 - لو حضرت كويس لموضوع الشرايبين هتعرف تتكلم وتستخدم نفس الآلية إنك تكون حافظ تعبيرات جاهزة تقولها لو حسيت ان الافكار هربت منك وانت بتتكلم
4 - الوقت اللي بيدهولك لتحضير الموضوع اللي هتتكلم فيه كافي جداً وهتقدر تحفظه قبل ماتدخل
55 - موضوع النقاش اللي بيتم بينك وبين زميلك بيكون عبارة عن تلت صورة كل واحد يختار انسب صورة للموضوع وفي الاخر بتقرروا تختاروا صورة واحدة
كمثال كان امتحاني عن اعلان عن كورس رسم و فيه 3 صور - ورد -فرش تلوين -رسمةD 3
أختار بينك وبين نفسك صورتين وحاول تفكر في جمل تقولها انت ليه اختارت الصورة دي حتى لو مش مقنعة ليك ومش مقنعة للي بيمتحنك المهم انك تقول اي سبب وخلاص ! انا خترت الرسمة الثري دي والورد وطبعا اتفاجأت ان البنت اختارت الورد واتكلمت قبلي فانا بسرعة لحقت نفسي واخترت الرسمة المجسمة وانها ابداع وجميلة وفيها موهبة وكام جملة بسيطة .. طبعا اللي قدامك المفروض يتمسك بصورته تاني ويقول سبب ليه هو متمسك بيها فانت هترد تاني انك متمسك بصورتك وتقول اي سبب حتى لو غير مقنع
بعدين هيقولك لاء بردو انا متمسك بصورتي ! متعملش ناصح وتاخدك العظمة وتقول هو احسن مني في ايه ! قوله ماشي وانا موافق وفعلاَ صورتك جميلة واختيار موفق واحنا هنختار الصورة دي ! اتنازل بعد تاني او تالت مره لو هو متنازلش ! لانك مش هتلاقي اسباب تاني تقولها صدقني وهتبوظ الحوار انت وهو ، انا مثلا كمثال اتنازلت للبنت فالممتحنة كانت ست وضحكت فرحت بحركة ذكاء قلت لها كما تعرفين ياسيدتي ان السيدات دائما تفوز في أي جدال ! واعرف ان النساء تحب الورد لذلك تنازلت .
. الست ضحكت ضحكة كبيرة جداً وقعدت تشكرني اني قلت جملة زي دي كمجاملة للستات ..
- انا متكلمتش عن الموضوع كويس ويمكن اتكلمت باسلوب اقل من B11 بس استغليت نقطة ذكاء في صالحي ادت انطباع كويس ... انت ممكن تستغل نقط كتير في الحوار لصالحك انك تقول رأيك بشفافية وتسرح بخيالك كأنك عالم فضاء ولازم لازم لازم تذكر تجربة ليك في الموضوع حتى لو من وحي خيالك لانه مش بيطلب منك الصدق بيطلب منك التعبير كويس
انا موضوعي عن العمل وكان طالب مني اتكلم عن حاجات معينة قعدت اسرح بيهم واقلهم تجربة ممرتش بيها اصلاً بس الممتحنة كانت متشوقة جداً للقصة ، وعبر عن رأيك بكل صراحة بدون ماتخاف انا قلت اننا بنشتغل في مصر كتير لاننا محتاجين نحسن مستوى المعيشة بسبب غلاء الاسعار وده بيأثر علي صحتنا بعد فترة طويلة من العمل .. الخ
- الممتحن مش هيقاطعك ابداً بس حاول تختصر الكلام في 33 او اربع دقائق بس واوعى تقف ابداً حتى لو هتقول اي كلام بس متقفش ارجوك ! لو وقفت مش هتعرف تكمل ! وهيدي انطباع انك حافظ موضوع ونسيته
- في الاول خالص هتقول مقدمة عن نفسك لازم تذكر فيها اسمك وسنك وعنوانك وليه بتتعلم الماني وعايز تسافر المانيا ليه وايه الغرض من الدراسة وخطتك كأنك بتكتب motivation letter للسفارة بالظبط وده هيديك نقاط قوة في البداية وهيعرفهم انك شخص طموح وعندك خطة فهيساعدوك تنجح وده اللي ساعدني فعلاً اني شرحت لهم خطتي كطبيب اسنان في المانيا فحسيت اني صعبت عليهم .
في النهاية دي تجربة شخصية بأرائي الشخصية اللي بتعبر عني ممكن اكون أخطأت أو اصابت في نقطة فحاول تبني ليك شخصيتك وارائك المختلفة وتستفيد من تجارب سابقة ، والاستراتيجية دي متبعة في اغلب التجارب وجابت نتيجة
أنا بحاول أرد على كل الناس اللي بتبعت لي رسايل على قد ما اقدر واسف جدا لو قصرت في الرد على أحد لأن والله مشغول حالياً في حاجات كتير وانا بشر عندي طاقة تحمل زيكم ! فمحدش يزعل مني لأي سبب يمكن يكون في نفسي موقفي يوم من الأيام وربنا يقويه على مساعدة الناس
وان شاء الله انتظروا مفاجأة مني لكل الناس اللي هتبتدي تتعلم ألماني من الصفر كنوع من انواع الدعم ليهم وان شاء الله بالتوفيق وانا تحت أمركم في اي مساعدة تخص اللغة الفترة القادمة على قدر استطاعتي
المصدر
هو فين البوست المعلق الي ذكرت فيه الأشياء لو سمحت؟
ردحذف